மாவீரர் நாள் - தாய் மண்ணின் விடுதலை என்கின்ற உன்னத கனவிற்காக தன்னுயிரைத் தந்த மனித தெய்வங்களின் புனித நாள். சுற்றி சுழலுகிற இந்த பூமிப் பந்தில் தமிழர் என்கின்ற தேசிய இனத்திற்காக ஒரு நாடு அமைய வேண்டும் என்கிற இலட்சியத்திற்காக இறுதிவரை போராடி களத்திலேயே தன் இறுதி மூச்சை சுவாசித்த மானங்காத்த மறவர்களின் ஈகப் பெருநாள்.

என் உயிர் அண்ணன் நம் தேசியத் தலைவர் மேதகு வே.பிரபாகரன் அவர்கள் காட்டிய திசையில் தமிழீழம் காண அலைகடல் போல ஆர்ப்பரித்து எழுந்த ஆயிரமாயிரம் மாவீரர்களின் நினைவைப் போற்றுகின்ற திருநாள். வரலாற்றுப் பக்கங்கள் முழுக்க வாழ்வாங்கு வாழ்ந்த ஒரு இனத்தின் மக்கள் இறையாண்மையோடு வாழ உதட்டில் நிறைந்த புன்னகையோடு மரணத்தை முத்தமிட்ட மகத்தான மாமனிதர்களின் பொன்னாள். எல்லோரையும் போல சாதாரண மனிதர்களாக பிறந்து தாயக விடுதலை என்கின்ற புனித நோக்கத்திற்காக மரணத்தை தொட்டு தன் வாழ்வையே சரித்திரம் ஆக்கிக் கொண்ட நம் நாயகர்களின் நினைவு நாள். தாய் நிலம் காக்க தன்னலம் மறுத்து உயிரைக் கொடையாக கொடுத்து விதையாக விழுந்த மாவீரர்களை வணங்கி நமக்குள்ளாக உறுதி ஏற்கின்ற உணர்ச்சி நாள்.

அத்தகைய புனிதநாளை ஒவ்வொரு ஆண்டும் நவம்பர் 27ஆம் நாள் நாம் போற்றி வணங்குவது வழக்கம். நாம் தமிழர் கட்சி இம்முறை நம் மாவீரர் நாளை மாவீரர் தெய்வங்களுக்கு வணக்கம் செலுத்துகிற நிகழ்வை திருநெல்வேலி மாவட்டம், அம்பாசமுத்திரத்தில் நடத்த திட்டமிடப்பட்டிருக்கிறது.

என் உயிருக்கு இனிய நாம் தமிழர் சொந்தங்கள் அனைவரும் பேரெழுச்சியாக நம்முடைய மாவீரத் தெய்வங்களை போற்றி வணங்குவதற்கு அங்கு கூட வேண்டும் என்று உணர்வோடும் உரிமையோடும் உறவோடும் அழைக்கிறேன்.

ஒரு தெய்வத்தை வணங்குவதற்கு இலட்சக்கணக்காக நாம் கூடுகிறபோது 50000-த்திற்கும் மேற்பட்ட நம் இனத்தின் காவல் தெய்வங்களை நாம் வணங்க மான உணர்வும் இன உணர்வும் கொண்ட என் இனச் சொந்தங்கள் எல்லோரும் பெருந்திரளாகக் கூடுவோம்.

இந்த நிகழ்வை பேரெழுச்சியாக நடத்துவதற்குப் போதிய அளவிற்கு நிதி வசதி இல்லாததால் மிக குறுகிய நாட்களே நம்மிடத்தில் இருப்பதால் எனது அன்புச் சொந்தங்கள் உங்களால் இயன்ற நிதிப் பங்களிப்பை திரள் நிதி திரட்டல் திட்டத்தின் கீழ் கொடுத்து உதவ வேண்டும் என்று அன்போடு கேட்டுக்கொள்கிறேன்.

என்னுடைய உயிரோடும் உணர்வோடும் கலந்து வாழுகின்ற அன்பு உறவுகள் அனைவருக்கும் வணக்கம்!